Tair Cenhedlaeth o'r Un Teulu o Gaernarfon yn Cystadlu yn Hyrox
Mae tair cenhedlaeth o'r un teulu o ardal Caernarfon yn gwneud enw iddyn nhw eu hunain mewn cystadlaethau Hyrox ledled Ewrop.
Chloe Tudor-Jones, 27 oed, sydd wedi annog ei chwaer Zara, ei thad Mark, a'i thaid Gwyn i gymryd rhan yn y gweithgaredd ffitrwydd hwn, ac maen nhw'n teithio i wahanol wledydd yn cystadlu.
Hyrox yw cystadleuaeth ffitrwydd dan do sydd wedi dod yn boblogaidd yn fyd-eang, gan gyfuno rhedeg gyda gorsafoedd ymarfer corff penodol.
Er gwaethaf y gwahaniaethau mewn oedran, mae'r teulu yn mwynhau teithio gyda'i gilydd ac yn cefnogi ei gilydd yn y gystadleuaeth, fel y soniodd Chloe wrth Aled Hughes.
Mae Chloe yn mwynhau mynd i'r gampfa yn ei hamser hamdden, ac yn fuan wedyn ymunodd ei chwaer Zara hefyd. Ymhen amser, ymunodd eu tad a'u thaid hefyd â'r un gampfa yng Nghaernarfon.
Yn gyntaf, dechreuodd y teulu fynd i gystadlu yn Hyrox yn Bae Colwyn cyn symud ymlaen i Hyrox Birmingham.
"Munud oeddan ni wedi bod i'r un cyntaf, a gweld yr arena ar holl bobl 'na, mae'r lle yn fawr ac yn brysur - pawb yn lliwgar ac yn awyddus i wneud yn dda - lot yna efo fflagiau ac ati - mae o'n rhoi'r buzz 'na i chdi - oeddan ni gyd wedi cael y bug wedyn ac isio #neud mwy a mwy," meddai Chloe.
Gwyn, y tad-cu, sydd wedi hanner ymddeol o'i swydd fel fferyllydd, dechreuodd ymarfer corff yn fwy cyson ar ôl cael sylw gan ffrind a sylweddoli ei fod "wedi magu bol".
"Nes i ddod mewn i'r peth ar ôl bod yn aelod o'r ganolfan hamdden am rai blynyddoedd yng Nghaernarfon. Roeddwn i'n mynd i ddosbarthiadau Hit, ac yn mwynhau.
"Yna daeth Covid a phopeth yn dod i stop. Ychydig wedyn roedd y genod wedi dechrau mynd i'r gampfa a finna' yn meddwl 'duwcs a'i yna hefyd, mae'n swnio'n reit dda', a dyna ni wedyn - roedd y lle ar hyfforddwyr yno'n gefnogol iawn o gystadlaethau o'r fath.
"Roedd Hyrox yn rhywbeth oedd sawl aelod o'r gampfa'n anelu ato, felly dyma benderfynu rhoi cynnig arni," ychwanegodd.
Ar ôl cystadlu yng Nghymru a Lloegr, dechreuodd y teulu edrych i gystadlu dramor, nid yn unig i gael profiadau newydd, ond hefyd fel cyfle i fynd ar wyliau gyda theulu ehangach, gan gynnwys aelodau nad oedd yn cystadlu.
"'Dan ni fel teulu yn mynd am gyfnod hirach fel bod Mam a Nain yn dod hefyd. 'Dan ni gyd yn mynd i gystadlu. Mae Mam a Nain yn hapusach yn tynnu llunia', ac am ddiwrnod neu ddau wedyn byddwn i'n mynd i grwydro a gweld ychydig o'r golygfeydd yn y wlad.
"Mae'n lyfli bod ni gyd yn mynd fel teulu," meddai Chloe.
Er bod Gwyn yn 67 oed, nid yw hynny wedi ei atal rhag cystadlu ac mae'n mwynhau'r profiad.
"Mae'n wych bod ni gyd yna fel teulu gyda'n gilydd," meddai Gwyn. "Dwi'n fferyllydd wrth fy ngwaith wedi ymddeol, ond yn dal i helpu ambell ddiwrnod, felly mae edrych ar ôl y corff a ffitrwydd wedi mynd law yn llaw i mi a dweud y gwir.
"Y peth gorau am gystadlu ydi cael mynd i wahanol lefydd, gweld ychydig ar y byd, rhannu profiadau gyda'r teulu, annog y genhedlaeth iau, a chadw fy hun yn ffit.
"Dwi'n edrych o'm cwmpas yn aml a fi ydi'r boi hynaf yna! Dwi'n teimlo'n dda, ac am ddal i fynd tra dwi'n gallu."
Mae'r teulu yn parhau i gymryd rhan mewn cystadlaethau Hyrox, gan gyfuno eu diddordeb mewn ffitrwydd gyda'r pleser o deithio a rhannu profiadau gyda'i gilydd.
Dilynwch Cymru Fyw ar Facebook, X, Instagram neu TikTok am y diweddaraf.
Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.
