Galw am fwy o ddiogelwch yn y Sioe Fawr ar ôl lladradau beiciau cwad

Galw am fwy o ddiogelwch ar faes y Sioe Frenhinol ar ôl lladradau beiciau cwad, gyda busnesau’n rhybuddio am effaith ar arddangos stoc.

Mae dyn busnes wedi galw am “fwy o ddiogelwch” ar faes y Sioe Frenhinol ar ôl i feiciau cwad gael eu dwyn dros y penwythnos. Dywedodd Will Ellis o Lanbedr Pont Steffan y byddai llai o fusnesau yn dod â stoc i’r sioe oni bai bod mwy yn cael ei wneud i atal digwyddiadau tebyg.

Mae adroddiadau bod sawl beic cwad wedi cael eu dwyn o faes y Sioe dros y penwythnos, ac mae’r Sioe Frenhinol wedi dweud eu bod yn ymwybodol o’r lladradau ac wedi cyflwyno mesurau diogelwch ychwanegol.

Wedi ei ganfod o fewn awr a hanner

Mae Will Ellis yn gyfarwyddwr ar gwmni D G Thomas Agri Ltd o Lanbed, ac mae wedi bod â stondin yn y Sioe Frenhinol ers blynyddoedd. Ond nid oedd wedi cael y dechrau gorau i’w wythnos ar ôl i un o’i feiciau cwad gael ei ddwyn oddi ar y maes.

Dywedodd iddo gyrraedd nos Wener i osod y stondin, ond fore Sul fe gafodd alwad ffôn gan Heddlu Dyfed-Powys yn dweud bod un o’i feiciau cwad wedi cael ei ddwyn.

Yn ffodus iddo, mae beiciau’r cwmni yn cynnwys ‘tracker’, ac felly roedd modd dod o hyd i’r beic yn sydyn.

“Ro’n i’n gwybod bod ’na tracker ar y beic, so galwad ffôn yn syth i’r cwmni tracker, a chware teg iddyn nhw, ’naethon nhw siarad yn syth gyda Heddlu Dyfed-Powys ac anfon gwybodaeth y live tracker iddyn nhw.

“O fewn awr a hanner roedden nhw wedi ffeindio’r beic ac roedd ar y ffordd ’nôl i’r sioe.”

Dyma’r beic cwad a gafodd ei ddwyn gan gwmni Will Ellis dros y penwythnos

Ag yntau wedi hen arfer â’r sioe, dywedodd Mr Ellis ei fod yn “siomedig iawn” ac wedi “cael ofn” yn dilyn y sefyllfa.

“Mae ’na obviously security fan hyn [ar y maes], a ’da ni’n talu lot am y stondin a meddwl bod stoc ni yn saff, a dydi o ddim.

“Ma’ hyn yn digwydd i ffermwyr ar draws Cymru ac ar draws Prydain - mae’n rhaid bod ’na rhyw fath o stop iddo.

“Roedd y beic ’ma dros £6,000. Mae ’na focs oedd ar y beic wedi cael ei ddwyn, a ’da ni ddim wedi cael hwnna ’nôl yn anffodus.”

Mae Heddlu Dyfed-Powys wedi cael cais am sylw.

Gwybod bod problem yma

Mae Mr Ellis o’r farn bod angen mwy o ddiogelwch ar faes y sioe er mwyn atal digwyddiadau o’r fath.

“Yn sicr mae angen mwy o ddiogelwch yma ar y maes.

“Mae ’na gymaint o ymdrech a phres yn mynd mewn i’r stoc i gyd, a gan y dealers a’r manufacturers i gyd.

“Mi fydd rhaid i ni gael mwy o ddiogelwch i barhau i ddod â stoc yma. ’Da ni’n gwybod bod ’na broblem yma.”

Cafodd beic cwad cwmni Neil Keeble hefyd ei ddwyn dros y penwythnos

Un arall a welodd un o’i feiciau yn cael ei ddwyn dros y penwythnos oedd Neil Keeble o gwmni KYMCO.

Yn debyg i Mr Ellis, fe ddaeth i’r sioe ddydd Gwener i osod ei stondin, ond erbyn dydd Sul fe gafodd wybod bod un o’i feiciau cwad wedi cael ei ddwyn.

“O gofio ein bod wedi gosod y stondin yr un fath am y bum mlynedd ddiwethaf, ro’n i wedi synnu,”

“Ond mae’n codi cwestiwn beth mae’r diogelwch ar y maes yn gwneud i’r holl stondinwyr.”

Ychwanegodd fod y digwyddiad yn ei wneud yn ansicr am ddychwelyd y flwyddyn nesaf.

“Rydych chi wastad yn conscious yng nghefn eich meddwl bod y math hyn o bethau am ddigwydd.

“Ond pan chi’n talu am stondin sy’n cynnwys diogelwch 24 awr yna mae’n rhaid i chi ddibynnu ar y trefnwyr.”

Mesurau diogelwch ychwanegol

Dywedodd Sioe Frenhinol Cymru eu bod yn “ymwybodol o’r adroddiad o’r beiciau cwad wedi eu dwyn”.

“Rydym yn rhannu’r rhwystredigaeth a’r pryder a gafodd ei achosi gan y digwyddiadau hyn, ac rydym yn cefnogi’r masnachwyr sydd wedi eu heffeithio a’r heddlu yn eu hymchwiliadau.