Menter gymunedol yn codi dros £145,000 i brynu tafarn leol
Mae grŵp Cynnal Bro Machno wedi llwyddo i werthu cyfranddaliadau gwerth dros £145,000 yn eu hymgyrch i brynu tafarn Yr Eagles ym Mhenmachno, sir Conwy.
Cadarnhaodd Gerwyn Edwards, cadeirydd y grŵp, bore Mawrth bod gan y gymuned bellach ddigon o arian i brynu'r dafarn, ar ôl ymgyrch lwyddiannus a ddechreuodd ddiwedd y llynedd ac a barhaodd ers mis Chwefror.
Ymgyrch i sicrhau dyfodol y dafarn
Mae'r gymuned wedi bod yn casglu cyfranddaliadau gyda'r nod o sicrhau bod y dafarn yn parhau i fod yn ganolfan bwysig i'r gymuned leol a'r Gymraeg.
"Mae 'na blaniau wedi cael ei rhoi yn eu lle yn barod i weld sut allwn ni altro'r Eagles ac i wella fo a'i oleuo fo, ac mae'r gwaith caled yn dechra' wedyn," meddai Mr Edwards.
Yn ystod rhaglen Dros Frecwast fore Mawrth, dywedodd Mr Edwards fod 491 o bobl wedi prynu cyfranddaliadau, gan godi cyfanswm o £145,701. Roedd y targed uchafswm ar gyfer prynu'r dafarn wedi'i osod ar £150,000, ac mae'r ffigur hwnnw wedi cael ei gyrraedd gyda chyfranddaliadau a rhoddion.
Bydd y cyfranddalwyr yn penodi pwyllgor i reoli'r dafarn, gan ddewis rheolwyr newydd a chynllunio newidiadau sylweddol i'r lle.
"Mae'r perchennog sydd bia fo 'wan, wedi bod yn amyneddgar iawn chwarae teg. Felly 'da ni'n prynu'r busnes fel y mae dal i redeg - mae'n dipyn haws i gadw'r olwyn i fynd na'i chodi hi a dechrau eto," ychwanegodd Mr Edwards.
Un o'r camau nesaf fydd adnewyddu'r llety sydd ar gael yn y dafarn, sy'n gallu cysgu 24 o bobl ar hyn o bryd.
Canolfan Gymraeg a chymunedol
Mae'r dafarn yn gartref i ddosbarth Cymraeg ac yn cynnal digwyddiadau eraill fel sesiynau canu rheolaidd, gan ei gwneud yn ganolfan bwysig i'r gymuned.
Mae achub y dafarn, sydd wedi bod ar werth am flynyddoedd, yn cael ei ystyried yn gam mawr ymlaen i'r gymuned leol.
"Wnaeth y gymuned ddod at ei gilydd i wneud hyn. Allwn ni m'ond mynd ymlaen 'wan," meddai Mr Edwards.
"Mae'r dafarn yn bwysig ym mhob pentre'. Ma'r eglwys yn agored ar ôl iddo ailagor -a hwnna di cau am 16 mlynedd - ma'r capel yn agored. Mae hyn yn cadw teuluoedd ifanc yn ein cymuned ni.
"Mae'r teuluoedd ifanc 'na yn dod a phlant efo nhw a mwy o egni hefo nhw, a wedyn mae'r ysgolion yn aros yn agored hefyd."
Mae'r ymgyrch yn dangos ymdrech gymunedol gref i gadw a datblygu adnoddau lleol sy'n hanfodol i fywyd cymdeithasol a diwylliannol y gymuned.
Dilynwch Cymru Fyw ar Facebook, X, Instagram neu TikTok i gael y newyddion diweddaraf. Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033. Lawrlwythwch yr ap am y diweddaraf o Gymru ar eich dyfais symudol.
