Gŵr yn cael ei anafu wrth gasglu ei blant ger hen Lofa Penallta
Mae trigolion ger hen Lofa Penallta ger Caerffili yn mynegi pryderon am ddiogelwch ar ôl i dresmaswyr daflu gwrthrychau o'r adeilad, gan achosi anaf i un person.
Ar ddydd Gwener diwethaf, cafodd gŵr o Roxanne Western-Weller ei anafu pan darwyd ei ben gan garreg a daeth o ffenestri'r hen loffa wrth iddo gasglu ei blant o Ysgol Gymraeg Penalltau gerllaw.
Yn ôl Heddlu Gwent, cafwyd nifer sylweddol o adroddiadau am ymddygiad gwrthgymdeithasol yn yr ardal y llynedd.
Yn ystod rhaglen Dros Frecwast ddydd Mercher, dywedodd Roxanne Western-Weller, ei wraig, ei bod wedi cael “sioc” pan glywodd fod ei gŵr yn gwaedu o'i ben wedi’r digwyddiad.
Mae perchnogion y safle, The Power Hall Limited, yn cadarnhau eu bod yn gweithio'n barhaus i sicrhau diogelwch y lleoliad ac yn cydweithio gyda'r heddlu a'r cyngor lleol.
Yn ôl llefarydd ar ran Cyngor Sir Caerffili, maent yn mynegi pryder am y digwyddiad diweddar ac yn condemnio ymddygiad y rhai oedd yn gyfrifol.
Manylion y digwyddiad
Cafodd Glofa Penallta ei chau yn 1991.
Esboniodd Roxanne fod ei gŵr wedi cael ei anafu ddydd Gwener diwethaf wrth iddo aros i fynd trwy giatiau'r ysgol i godi ei blant.
"Cafodd ei guro ar ei ben gan garreg oedd wedi dod allan o'r ffenestri. Roedd yn bach o sioc ar y pryd a doedd e' dim yn gwybod beth oedd wedi digwydd."
Roedd gwaed ar ei ben a'i ddwylo, ond roedd yn lwcus am y rhieni oedd o'i gwmpas a'r cymorth cyntaf a gafodd gan staff yr ysgol.
"Oedden nhw bron a bod wedi ffonio ambiwlans achos doedden nhw methu stopio ei ben rhag gwaedu."
Ar ôl dod adref, aeth y ddau i adran brys yr ysbyty, lle aethant drwy'r nos cyn dychwelyd adref yn gynnar y bore wedyn.
"Wedodd y doctor: 'You're a very lucky man'."
Pryderon am ddiogelwch y safle
Mae Roxanne yn mynegi pryder am blant bach yr ardal sy'n gadael yr ysgol wrth ymyl yr adeilad.
"Sa un o rheina wedi medru cael eu bwrw ar y pen. Dydy'r adeilad ddim yn ddigon diogel.
Ma' 'na bobl ifanc, neu oedolion ifanc, yn mynd mewn i'r adeilad pob hyn a hyn ac mae'n achosi lot o broblemau i ni fel cymuned yma yng Nghwm Calon."
Ychwanegodd fod wedi siarad gyda pherchennog y safle ddydd Mawrth a bod mesurau wedi cael eu rhoi fel giât a railings o gwmpas yr adeilad.
"Ond dydy hyn ddim yn ddigon da, mae plant yn gallu mynd dros y giât, maen nhw wedi torri'r giât gyda rhyw fath o angle grinder.
Maen hollol agored nawr i unrhyw un fynd mewn," meddai Roxanne, gan ychwanegu bod ffenestri ar agor hefyd.
Dywedodd Cyngor Caerffili fod y cyngor mewn cysylltiad cyson gyda'r tirfeddiannwr i sicrhau bod mesurau addas yn cael eu rhoi i wneud y safle'n ddiogel, ond bod angen gwneud mwy.
Ymateb Heddlu Gwent
Dywedodd Heddlu Gwent eu bod wedi derbyn adroddiad am ddyn gyda mân anaf tua 15:15 ddydd Gwener, wedi i garreg gael ei thaflu ato gan droseddwr na chafodd ei weld.
Yn ôl yr Arolygydd Lysha Thompson, anfonwyd swyddogion i'r ardal ond ni chafwyd neb yno.
"Y llynedd, cawsom nifer sylweddol o adroddiadau am ymddygiad gwrthgymdeithasol o gwmpas Glofa Penallta yn Hengoed."
Ychwanegodd fod y llu yn gweithio gyda pherchennog y safle a'r cyngor i sicrhau bod yr adeilad wedi'i ddiogelu.
Dilynwch Cymru Fyw ar Facebook, X, Instagram neu TikTok.
Anfonwch syniadau am straeon i cymrufyw@bbc.co.uk neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.
