Cyhoeddi Rhestr Fer Llyfr y Flwyddyn Cymraeg 2026
Mae cyfanswm o 12 awdur yn cystadlu mewn pedwar categori gwahanol ar gyfer Gwobr Llyfr Cymraeg y Flwyddyn 2026, a gyhoeddwyd gan Lenyddiaeth Cymru.
Mae'r rhestr fer yn cynnwys llyfrau sy'n cystadlu am y Wobr Ffuglen, Gwobr Farddoniaeth, Gwobr Ffeithiol Greadigol a Gwobr Plant a Phobl Ifanc.
Cafodd y rhestr ei chyhoeddi gan y beirniaid ar raglen arbennig Llyfr y Flwyddyn 2026 ar BBC Radio Cymru brynhawn Sul, gyda Nest Jenkins yn cyflwyno.
Bydd y seremoni wobrwyo yn cael ei chynnal yn Galeri Caernarfon ar nos Iau, 9 Gorffennaf, gyda gwobr o £1,000 i bob enillydd categori a £3,000 ychwanegol ar gyfer y brif wobr.
Mae Gwobr Llyfr y Flwyddyn wedi ei chynnal gan Llenyddiaeth Cymru ers 2004.
Beirniaid y cystadlaethau Cymraeg eleni yw'r Prifardd a'r awdur Ifor ap Glyn, Yr Athro Gwenno Ffrancon, yr awdur a'r golygydd Dr Sioned Puw Rowlands, a'r cyflwynydd Dafydd Lennon.
"Bu'n fwynhad pur darllen y gweithiau ffuglen Cymraeg a gyhoeddwyd eleni a phwyso a mesur yr amrywiaeth eang o gyfrolau a ddaeth i law," meddai Gwenno Ffrancon ar ran y panel Cymraeg.
"Gyda'r byd yn gwallgofi bron yn ddyddiol, roedd hi'n hyfryd cael dianc i fydoedd cyfarwydd ac anghyfarwydd a mwynhau doniau a ffrwyth dychymyg yr awduron."
Bydd yr awduron llwyddiannus yn derbyn tlysau Llyfr y Flwyddyn hefyd, wedi'u dylunio gan yr artist Angharad Pearce Jones.
Mae cyfle i ddarllenwyr fynegi barn, gan fod Golwg360 a Nation Cymru yn cynnal pleidleisiau Barn y Bobl a People's Choice ar eu gwefannau. Bydd enillwyr y gwobrau hynny'n cael eu henwi yn y seremoni wobrwyo hefyd.
Rhestr Fer Gymraeg 2026
Gwobr Ffuglen - Noddir gan Cyfrifyddion HSJ
- Dau, Bethan Nantcyll (Gwasg y Bwthyn)
- Hiraeth Neifion, Simon Chandler (Gwasg Carreg Gwalch)
- Tri, Sonia Edwards (Gwasg y Bwthyn)
Gwobr Farddoniaeth - Cefnogir gan Parry Davies Clwyd-Jones & Lloyd
- Trochi, Carwyn Eckley (Gwasg Carreg Gwalch)
- Chwarter Eiliad, Jo Heyde (Barddas)
Gwobr Ffeithiol Greadigol - Noddir gan Stori Cymru
- Lobsgows – Cariad y Cymry at Fwyd, Ruth Richards (Gwasg Carreg Gwalch)
- Y Cyfan a Fu Rhyngom Ni – Ar Lwybrau 'Atgof' Prosser Rhys, Iestyn Tyne (Gwasg y Bwthyn)
- Ynysoedd Gobaith – Mentrau a Syniadau Iwtopaidd yng Nghymru'r Ugeinfed Ganrif, Llion Wigley (Gwasg Prifysgol Cymru)
Gwobr Plant a Phobl Ifanc - Cefnogir gan Gronfa Elw Park-Jones
- Anfarwol, Rebecca Roberts (Gwasg Carreg Gwalch)
- Gerwyn Gwrthod a'r Llyfr Does Neb yn Cael Ei Ddarllen, Sion Tomos Owen (Atebol)
- Y Cae Ras, Manon Steffan Ross (Y Lolfa)
Dywedodd Claire Furlong, cyfarwyddwr gweithredol Llenyddiaeth Cymru:
"Llongyfarchiadau mawr i'r awduron ar y rhestr fer eleni.
Bu'n flwyddyn ragorol arall i lenyddiaeth Gymraeg a Chymreig, sy'n cael ei adlewyrchu nid yn unig yn y rhestr anhygoel hon, ond hefyd o edrych ar yr holl lyfrau gwych a gyhoeddwyd dros y flwyddyn ddiwethaf.
Mae'n rhaid fod y beirniaid wedi cael cyfnodau dwys iawn o grafu pen!
Rydym bob amser yn edrych ymlaen at ddarganfod eu dewisiadau ac yn cael mwynhad mawr o'r cyfnod rhwng cyhoeddi'r rhestr fer a'r seremoni wobrwyo - amser i ddarllen, trafod a dathlu.
Ewch draw i'ch siop lyfrau neu lyfrgell leol, darganfyddwch y llyfrau rhyfeddol hyn, ac ymunwch â'r sgwrs: beth yw eich Llyfr y Flwyddyn chi yn 2026?"
Dilynwch Cymru Fyw ar Facebook, X, Instagram neu TikTok.
Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.
Pynciau cysylltiedig
Straeon perthnasol
- Gwobr Llyfr y Flwyddyn i ddychwelyd i Gaernarfon
- Hunangofiant 'gonest a phwerus' yn ennill Llyfr y Flwyddyn 2025
- Dewch i adnabod enillwyr Llyfr y Flwyddyn 2025
