Rhybudd oren am wyntoedd cryfion i'r gogledd orllewin
Mae'r Swyddfa Dywydd wedi cyhoeddi rhybudd oren am wyntoedd cryfion i'r gogledd orllewin Cymru dros y penwythnos y Pasg. Bydd y rhybudd yn cael ei weithredu o 19:00 ddydd Sadwrn tan 03:00 fore Sul.
Mae'r rhybudd oren yn effeithio ar siroedd Conwy, Gwynedd ac Ynys Môn. Disgwylir hyrddiadau rhwng 60-70 milltir yr awr ar draws yr ardal, gyda'r posibilrwydd o gyrraedd 80 milltir yr awr mewn rhai mannau penodol.
Yn ogystal, mae rhybudd am y posibilrwydd o donnau mawr a allai achosi perygl ar hyd yr arfordir.
Yn ogystal â'r rhybudd oren, mae'r Swyddfa Dywydd wedi cyhoeddi rhybudd melyn am wyntoedd cryfion i siroedd Ceredigion, Sir Ddinbych, Sir y Fflint, Sir Benfro a Phowys. Bydd y rhybudd melyn yn effeithiol o 17:00 ddydd Sadwrn tan 07:00 fore Sul.
'Pob dim wedi ei ohirio'
Wrth siarad ar raglen Dros Frecwast fore Sadwrn, mynychodd Nia Rhys Jones, sydd wedi gweithio yn y sector dwristiaeth am dros 30 mlynedd, i drafod effaith y tywydd ar y diwydiant.
"Bydd 'na oblygiadau anodd iawn i'r diwydiant yn sgil y tywydd," meddai.
Esboniodd fod y tymor wedi bod yn "aeaf hir a gwlyb iawn" ac y bu'r sector yn disgwyl y penwythnos hwn, sy'n dechrau swyddogol i dymor y gwyliau.
"Roedd 'na ddwy long foethus iawn i fod i lanio yng Nghaergybi, un heddiw ac un 'fory, oedd i fod i dywys ymwelwyr am ddau ddiwrnod yma.
Mi gafon ni wybod nos Fercher nad oedden nhw am ddod i Gaergybi mwy, a'u bod wedi glanio yn Lerpwl," ychwanegodd.
Nia yw tywysydd bathodyn glas Cymru ac yn berchen ar fwthyn gwyliau ar Ynys Môn, gan weld effaith y tywydd yn uniongyrchol ar ei gwaith.
"Beth sy'n bwysig i bobl gysidro ydi, nid yn unig y tywyswyr [sydd wedi eu heffeithio], ond mae 'na ddegau o fysys wedi eu llogi ar gyfer y penwythnos 'ma yng Nghaergybi, yr atyniadau, oeddwn i fod i fynd â chriw bore 'ma a p'nawn 'ma i Gastell Biwmares... ma' pob dim wedi cael ei ohirio".
Mae Nia wedi ceisio annog y cwmni i drefnu teithiau allan o Lerpwl gan fod modd cyrraedd gogledd Cymru o Lerpwl, ond mae'r cwmnïau wedi penderfynu peidio â gwneud hynny.
Dilynwch Cymru Fyw ar Facebook, X, Instagram neu TikTok am y diweddaraf. Anfonwch syniadau am straeon i cymrufyw@bbc.co.uk neu cysylltwch drwy WhatsApp ar 07709850033. Lawrlwythwch yr ap am ddiweddaraf Cymru ar eich dyfais symudol.
