Rhun ap Iorwerth yn debygol o gael ei ethol yn Brif Weinidog Cymru
Gall Rhun ap Iorwerth gael ei ethol yn Brif Weinidog Cymru cyn gynted â dydd Mawrth.
Bydd Cymru'n cael ei Brif Weinidog Plaid Cymru cyntaf yr wythnos hon, ar ôl i dair o bleidiau'r Senedd awgrymu y byddant naill ai'n cefnogi Rhun ap Iorwerth neu'n atal eu pleidlais.
Mae Ken Skates, arweinydd dros dro Llafur, wedi awgrymu y bydd ei grŵp yn atal eu pleidlais.
Mae Jane Dodds, unig aelod Democratiaid Rhyddfrydol y Senedd, hefyd wedi dweud ei bod yn bwriadu atal ei phleidlais hi.
Fodd bynnag, bydd y Blaid Werdd yn cefnogi Rhun ap Iorwerth, sy'n golygu nad oes gan y pleidiau eraill y rhifau i rwystro ei enwebiad.
Gall y bleidlais gael ei chynnal cyn gynted â dydd Mawrth, a'r unig beth sydd ei angen ar Rhun ap Iorwerth yw cael mwy o bleidleisiau na unrhyw ymgeisydd arall, nid mwyafrif llwyr, i ennill.
Bydd ASau Reform yn enwebu eu harweinydd, Dan Thomas, i fod yn Brif Weinidog, ond nid yw'r rhifau yn y siambr o'u plaid.
Mae Reform wedi cadarnhau y byddant yn enwebu eu harweinydd Dan Thomas.
Bydd y Ceidwadwyr yn penderfynu eu cynlluniau mewn cyfarfod yn ystod y dydd, ond beth bynnag fydd eu penderfyniad, nid oes ganddynt y rhifau i rwystro Plaid Cymru.
Cyn y bleidlais dyngedfennol, rhaid i'r Senedd ethol Llywydd. Hyd yma, dim ond Paul Davies o'r Ceidwadwyr sydd wedi cynnig ei hun am y swydd.
'Pobl wedi dewis gobaith' yn ôl arweinydd Plaid Cymru
Mae Rhun ap Iorwerth wedi rhybuddio ddydd Sul ei fod yn barod i 'fynd â'r frwydr' yn erbyn Llywodraeth y DU a'u dwyn i gyfrif os na fyddant yn "gwneud y peth cywir dros Gymru".
Prif flaenoriaeth: Gwella'r gwasanaeth iechyd
Pa bynnag drefniadau a'r cyffro yng Nghaerdydd wrth i Blaid Cymru baratoi i ffurfio llywodraeth leiafrifol, mae gwella'r gwasanaeth iechyd yn parhau i fod yn brif flaenoriaeth i lawer o etholwyr.
Daeth hyn yn amlwg wrth holi pobl ym Mhwllheli, waeth pa blaid gafodd eu cefnogaeth yn yr etholiad ddydd Iau diwethaf.
Fel un a bleidleisiodd dros Blaid Cymru, dywedodd Valerie Griffiths fod canlyniad yr etholiad "yn dda iawn", ond mae hi eisiau mwy o gefnogaeth i'r GIG ac i fusnesau er mwyn "helpu i gadw siopa' i fynd" gan fod "mae'n reit ddistaw 'di mynd" mewn rhannau o Bwllheli.
Roedd Merfyn Roberts o Blaid Reform yn teimlo bod angen i'r llywodraeth newydd ganolbwyntio ar y gwasanaeth iechyd a "sortio pobol sydd ar benefits".
Ar ôl cefnogi Plaid Cymru yn yr etholiad, dywedodd Gerallt Wyn Griffiths ei fod hefyd eisiau blaenoriaethu gwasanaethau ysbyty a "rhoi mwy o arian iddyn nhw - stopio'r waiting lists 'ma".
Dilynwch Cymru Fyw ar Facebook, X, Instagram neu TikTok.
Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.
