Dân mawr yn Sir Conwy yn parhau ddydd Llun
Mae disgwyl i dân mawr yn Sir Conwy barhau ddydd Llun wrth i dywydd poeth ychwanegol effeithio ar Gymru, yn ôl y gwasanaeth tân.
Mae swyddogion tân wedi bod yn brwydro tanau ar Fynydd Conwy a Bwlch Sychnant ers bore Sul ac wedi gweithio drwy'r nos i geisio rheoli'r tân.
Hyd yma, mae tua 200 erw o dir wedi cael eu heffeithio gan y tân.
Cafodd trigolion o bentref Capel Ulo ger Penmaenmawr eu cynghori i adael yr ardal oherwydd y mwg trwm, ac maen nhw'n aros am wybodaeth ynghylch pryd y gallant ddychwelyd i'w cartrefi.
Dyfarnwyd y digwyddiad fel "digwyddiad difrifol" ddydd Sul gan y gwasanaeth tân.
Mae disgwyl i'r tân ddwysáu eto, meddai llefarydd ar ran y gwasanaeth tân,
"ond mae ein timau wedi bod yn cynllunio drwy'r nos i baratoi ar gyfer hynny".
"Gafon ni ein deffro tua 05:00 [fore Sul] gyda'r tŷ yn llawn mwg"medd un person lleol, tra dywedodd un arall ei bod hi'n "ofnadwy".
Effaith ar drigolion Capel Ulo
Tân mawr ar Fwlch Sychnant sydd wedi bod yn llosgi ers yr oriau mân ddydd Sul ac mae hyn wedi effeithio ar rai o drigolion pentref Capel Ulo.
Dywedodd Gwyndaf Pritchard, sy'n byw yn Nwygyfylchi, fod "oglau llosgi mawr" yn y dyffryn o hyd fore Llun.
Wrth siarad ar raglen Dros Frecwast ar BBC Radio Cymru, dywedodd ei fod wedi cael ei ddeffro gyda'r tŷ yn llawn mwg fore Sul, ac aeth yn y car i weld beth oedd yn digwydd.
"Oedd y dyffryn i gyd yn llawn mwg a'r lludw'n dod i lawr hefyd,"meddai.
"Oeddach chi'n gallu gweld y fflamau ar y dyffryn - o'ddan nhw'n symud yn gyflym iawn.
"Mae Sychnant ei hun wedi cal difrod mawr i'r byd natur."
Pawb yn cefnogi ei gilydd yn y gymuned
Mae Mr Pritchard, sy'n gosod tai haf yn yr ardal, wedi gallu cynnig un o'i dai yn Nwygyfylchi i deulu pryderus a oedd wedi gorfod gadael eu cartref.
"Maen nhw'n bryderus dros ben,"meddai.
Mae Mr Pritchard yn pwysleisio bod y prif bwyslais yn awr ar ddiogelwch pobl, gan ddweud:
"Be' sy'n bwysig ydy does 'na ddim llawer o anafiadau".
Fodd bynnag, mae'n mynegi pryder mawr am yr effaith ar y byd naturol yn yr ardal.
"Mi gymerith hi flynyddoedd i ddod â'r ardal yn ôl at ei gilydd,"meddai.
"Mae'r gymuned yn agos yma - pawb yn edrych ar ôl ei gilydd - a dyna sy'n bwysig am y gymuned yma."
Heriau i'r diffoddwyr tân
Dywedodd Tim Lloyd, cyn-ddiffoddwr tân sy'n byw yn y pentref, ei fod yn cydymdeimlo â'r diffoddwyr tân sy'n wynebu amodau anodd.
"Mae'r gwynt yn codi unwaith eto,"meddai ar Dros Frecwast,
"a hwnnw ydy'r drwg".
"Mae'r job yn un andros o anodd i'r diffoddwyr tân drio cadw ar ben petha'."
Esboniodd fod y mynydd yn rhy serth a pheryglus i'r diffoddwyr frwydro'r fflamau'n uniongyrchol, felly
"maen nhw just yn gorfod disgwyl i'r tân gyrraedd nhw a wedyn diffodd y tân".
Dywedodd hefyd fod y tai ar ochr arall y lôn o'i gartref
"ynghanol y mwg - o'dd hi'n ofnadwy".
Gweithredu'r gwasanaeth tân
Dywedodd Anthony Jones o'r gwasanaeth tân eu bod wedi cael galwad am 02:15 fore Sul ac wedi gorfod delio
"â nifer sylweddol o ddigwyddiadau difrifol ar draws gogledd Cymru".
"Bu ein diffoddwyr tân yn gweithio drwy'r nos, gan ddechrau ddoe yn y bore, ac maen nhw'n parhau ar y safle heddiw,"meddai fore Llun.
"Mae tua 200 erw o dir wedi'u heffeithio."
Esboniodd fod y tân wedi cyrraedd tua 1.6 cilomedr o hyd ar ei waethaf, gan ei gwneud yn ddigwyddiad mawr a sylweddol i'r gwasanaeth tân.
"Oherwydd y tirwedd anodd iawn ar Fynydd Conwy, mae'n anodd iawn i ni gael ein timau yno. 'Da ni'n disgwyl bod yno am beth amser.
"Wrth i'r tymheredd godi yn yr ardal y bore 'ma ac yn ystod y dydd, 'da ni'n disgwyl gweld y tân yn dwysáu eto, ond mae ein timau wedi bod yn cynllunio drwy'r nos i baratoi ar gyfer hynny."
Dilynwch Cymru Fyw ar Facebook, X, Instagram neu TikTok am y diweddaraf.
Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.
